WILLEMSTAD – E siudadano di fam van der Veen, kende tin 21 aña di edat dia 21 di yanüari 2025 a bira responsabel pa un aksidente di tráfiko ku a kousa morto di un señora ku yama E. Monte-Lopez riba Nijlweg, krusada Frater Radulpusweg. E shofùr van der Veen sintá den un Chevrolet Malibu ku e plachi di number T 88-72, biniendo for di rotónde Palu Blanku tabata manehá e vehíkulo ku un velosidat asina haltu ku e no por a para e outo yegando na e lusnan di tráfiko stashoná riba e krusada Nijlweg – Frater Radulphusweg, komo konsekuensia di esaki el a dal den un outo mitsubishi Lancer ku a plachi di number L 35-15, ku tabata bini for di Frater Radulphusweg kousando un desaster total, inkluso ku morto di e shofùr señora E. Monte-Lopez. Den sala di korte djarason 27 di mei 2026 e kaso aki a bini ampliamente padilanti dirigí pa wes señora mr. M.C.B. Hubben. Klaramente a bini padilanti ku e velosidat ku kua van der Veen tabata manehá e vehíkulo tabata inkreibelmente haltu. Pero den sala di korte el a deklará na sierto momento ku brake no a funshoná. Famianan di e víktima tabata presente i lágrima a deramá na momento ku unu di nan tabata hiba palabra pa kompartí algu di e víktima i hustamente e sirkunstansia doloroso ku nan a keda aden ku sin duda ta rekerí yudansa profeshonal. Pa kolmo e víktima tabata regresando kas despues di a kaba di hiba notisia di morto pa publiká den korant, pa haña e mes konfrontá ku un desgrasia asina horibel.

Wes a para ketu na e pregunta kon van der Veen ta sinti su mes despues di skucha famianan kompartí nan doló pa e desgrasia mortal ku el a kousa. E akusado van der Veen a splika ku tur dia e ta kòrda ku hopi lamento i tristesa riba e desgrasia i e persona ku a pèrdè su bida. Awendia e no ta sinti ‘at all’ pa pasa na e sitio di e desgrasia mes.

Fiskal señora mr. S.M. Scheer a demandá un kastigu di trabou di 240 ora, sino 120 dia den prizòn di kua 60 dia kondishonal mará na un periodo di prueba di 3 aña. Tambe van der Veen ta pèrdè su reibeweis pa un periodo di 9 luna. Wes señora mr. M.C.B Hubben a keda ku dia 17 di yüni binidero lo e dikta sentensia.