WILLEMSTAD – E siudadano di fam Pieternella (50 aña di edat) dia 29 di aprel 2026 mester a presentá den sala di korte, pero esei no tabata e kaso! Esaki ta pasobra dia 4 di òktober 2025 a konstatá ku el a manehá un vehíkulo riba kaminda públiko, siendo el a konsumí demasiado alkohòl.

Segun resultado di e tèst di rosea (esta esun di suplamentu di airu), Pieternella a skor 1250 microgram ku ta 5 biaha e kantidat ku ta permití den tráfiko. E tabata koriendo riba Kaminda Douvert Boy Nicolina fuertemente bou di influensia di alkohòl i ademas e no tabatin reibeweis huntu kuné. Pa tal motibu Pieternella ta den violashon di e lei di tráfiko basá riba uzo eksesivo di alkohòl i korementu sin e reibeweis válido.

E puntonan ariba menshoná  tabata rason pa yama Pieternella pa bin duna kuenta i rason den sala di korte dia 29 di aprel último, pero e akusado Pieternella no a presentá, solamente su abogado señora mr. Maribel Gomes tabata presente. Fiskal señora mr. S.M. Scheer mesora a remarká ku tratamentu di e kaso aki lo no por tuma lugá den ousensia di Pieternella, pasobra e violashon ta unu muchu grave, komo tal korte a bai di akuerdo ta posponé tratamentu di e kaso pa 27 di mei binidero. Simplemente bisá Pieternella ta obligá di presentá den sala di korte riba e fecha ku a keda stipulá.