Nuto Wawoe i Lourens, ámbos será na Hulanda, den apelashon kontra kastigu

Kaso proforma Nuto Wawoe, den apelashon kontra kastigu

WILLEMSTAD – Djaweps 11 di yüni a tuma lugá tratamentu di e kaso proforma di Urvin ‘Nuto’ Wawoe, kende aktualmente ta enkarselá den un prizòn na Vught. Tabata un kaso ku a keda atendé via vidioconference. Esaki ta den kuadro di preparashonnan pa apelá kastigu di bida largu ku anteriormente a keda diktá kontra di Nuto Wawoe.

E tres wesnan ku a atendé e seshon akí ta señora mr. P.M. Leijten, señora mr. F.V.L.M. Wannyn i señora mr. E.J. van Rijssen, kende a fungi komo presidente.

Tambe tabata presente abogado señora mr. Alicia Blonk den sala di korte akí na Kòrsou i fiskal na nòmber di Ministerio Públiko. Via vidioconference por a tuma nota di presensia di Nuto Wawoe, huntu ku 1 abogado aya na Ulanda i 1 funshonario di Ministerio Públiko ulandes.  E abogado aya na Ulanda a splika entre otro kambionan ku a keda hasí den formulashonnan ku tabatin den e dokumentu di hustisia, entre otro ku lo skucha Kuchi komo testigu. Ademas tabatin algun opservashon tokante desfunshonamentu di e laptop di Wawoe.

E idea ta pa dia 25 di yüni binidero tene un ‘regiezitting’ pa kontinuá ku mas preparashon. Promé ku a sera tratamentu di e kaso, e detenido Urvin ‘Nuto’ Wawoe a bini na palabra i a reklamá e trato inhumano versus di su persona: E tin 7 luna sin tene kontakto ku famia. Esaki den bista di Wawoe ta pa kibré mentalmente.  Wes mr. van Rijssen na final di e sekshon a opservá ku lo tene kuenta ku tur loke a keda tresé padilanti, e kambionan den formulashon di dokumento i inkluso e reklamonan di Nuto Wawoe tokante e trato ku e ta risibiendo den prizòn aya na Vught.

Lourens kondená pa asesinato di vários hende(sikario) den apelashon

A trata su kaso proforma

WILLEMSTAD – Otro detenido aktualmente enkarselá den prizòn na Hoog Catharijnnen-Ulanda ku su kaso tambe a keda tratá proforma djaweps 11 di yüni 2026, ta Cedricson Lourens, kende a keda kondená pa asesinato di vários siudadano, komo tal ta sintando un kastigu di prizòn masha pisá mes, pasobra e ta konsiderá un sikario. Siendo enkarselá aktualmente na Ulanda, tratamentu di su kaso den apelashon proforma a tuma lugá via e sistema di vidioconference. E wesnan ku a asistí ta mr. J.A.W. van ‘t Westeinde, mr. P.P.C.M Waarts i mr. H.M.E. Tebbenhof Rijnenberg. Cedricson Lourens ta konsiderá ku e ta inosente, es desir ku e no a mata ningun hende, p’esei el a bai den apelashon kontra di e kastigu imponé riba dje. Dia 25 di yüni binidero lo trata su kaso regie, pa djei sigui den e apelashon.