MFK: Tin un situashon anto awe nochi ta bai atendé

WILLEMSTAD— Gilmar Pisas, promé minister di Kòrsou a tene un konferensha di prensa ku e meta pa trese trankilidat den komunidat despues ku minister di finansa Cooper a post riba Facebook den wikènt ku e ta bai pidi investigashon riba 8.3 mion di plaka di ‘online gaming’ ku ta bai pa paga un kompania na Malta. Sr. Pisas a duna di konosé ku awe nochi ta bai atendé i informá su miembronan riba e situashon ku a surgi. MFK a skucha minister Cooper i tambe parlamentario Silvania.

Pisas a splika ku tin hopi desaroyo positivo na Kòrsou. Tantu den turismo, den deporte nos hóbennan ta sigui saka kara, den kriminalidat Kòrsou ta un di esnan di mas sigur anto asina tin hopi desaroyo mas ku ta hopi positivo. Pues no mester bai konsentrá riba un punto ku ta na diskushon.

Tur kos a kuminsá den wikènt ku e post di minister Cooper. promé minister ta indiká ku minister di finansa a duna basta deklarashon riba e loke el a deklará i e eks minister di finansa a reakshoná.

Pisas ta kere ku mester trese trankilidat. A bin ku e lei LOK i e ta kanando den bon direkshon, esei no ta nifiká ku ora nota algu ku no ta bon ku no por pidi un investigashon. A duna hunta di komisario enkargo pa laga hasi investigashon. Otro asuntu ta ku tabatin un hunta komisario anterior, nan a baha i otro a bini.

Sr.Pisas a garantisá ku awe nochi 7:30 na WTC nan ta reuní. A papia ku Cooper i tambe ku Silvania pues awor ta bai ‘media stilte’ pa den trankilidat por hasi investigashon pa trese solushon.