WILLEMSTAD— Djabièrnè 12 di yüni 2026 tabatin tratamentu di e kaso di dos muhé dominikano ku a bringa ku otro ferosmente dia 20 di desèmber 2025 na un snèk  den Bandariba, patras di e negoshi ‘Bon Prijs’ (Weto). E akusado prinsipal ta di fam Paredes-Luna, kende tin 52 aña di edat, siendo e víktima ta di fam Reyes Polanco. Segun a keda tresé padilanti e víktima di fam Reyes Polanco a bebe bira burachi i a kuminsá komportá di un forma totalmente inaseptabel. A papia kuné di tur sorto di manera, pero sin resultado. Na sierto momento doño di e snèk, esta Paredes-Luna a disidí ku ta sera e snèk pa evitá ku kosnan ta sali fo’i man. Pero e señora Reyes-Polanco a rabia i a kuminsá pleita ku doño di e snèk, Paredes Luna, te ku a krea hinter un bringamentu entre nan dos, kaminda Reyes Polanco a bin resultá heridá. Riba e situashon di Reyes-Polanco ku a bin keda ku un kara bastante heridá pa kòrtánan produndo den kara, tin diferente vershon:

1. Ku ta Paredes-Luna lo a kibra un bòter di serbes i bringa ku Reyes-Polanco, anto a heridá e señora den su kara. Tin testigu ku a duna tal deklarashon. Entre otro un tal Jeannette.
2. E otro vershon ta ku Reyes-Polanco ku tambe a kibra un bòter pa bringa kuné kontra di Paredes-Luna lo a slep dal abou den e plas di serbes ku a basha abou na suela, heridando su kara den e pida glasnan ku tabatin riba flur.

Abogodo mr. Dave Brug tabata hopi fuerte durante e defensa di su kliente Paredes-Luna, mustrando ku no tin prueba ku ta Paredes-Luna a heridá e víktima. E abogado a sita diferente deklarashonnan ku a bini padilanti, mustrando ku e señora víktima durante e anochi tabata fuma i molestioso i ku ta e mes a dal abou i heridá su kurpa, kòrtando den su kara i na man. Hasta tin papiá ku e víktima a bini ku un pida palu riba Paredes-Luna pa agredí esaki.

Fiskal señora T. Keller sinembargo a para ariba ku loke a sosodé tabata pa gran parti pa responsabilidat di Paredes-Luna. E señora aki a kaí será. Wes señora mr. Hubben, refiriendo na e pòtrètnan saká di e víktima heridá i tur na sanger, a hasi diferente pregunta hopi profundo na e akusado Paredes-Luna, entre otro riba e gravedat di e heridanan na kara di Reyes-Polanco. Pero akí Paredes-Luna a reakshoná masha ‘cool’ mes, komo sifuera e no tin ningun klase di sintimentu di konsiderashon pa e víktima. Wes a mustra ku tin 5 biaha kaba ku e señora a keda operá na su kara (sirugia plástiko). E víktima tambe a presentá ku 1 abogado pa pleita su kaso.

Fiskal senora mr. Keller a yega na e demanda di 24 luna kastigu di prizòn di kua 12 una kondishonal, kitando e temporada ku e akusado Paredes-Luna a pasa den aresto preventivo, anto e parti kondishonal ta mará na un periodo di prueba di 2 aña.

Abogado mr. Dave Brug a bini fuertemente aden, splikando ku no ta aseptabel ku no a logra haña Jeannette pa duna deklarashon, siendo e persona akí ta menshoná komo testigu. Klaramente abogado Dave Brug a sigui mustra ku e fail ta inkompletu i no por ku di e forma akí ta perhudiká su kliente. Wes mr. Hubben a bai di akuerdo pa wanta tratamentu di e kaso pa tempu indefiní. Via wes-komisario mester buska aserkamentu di Jeannette pa laga esaki deklará ainda. Lo mester apuntá un otro fecha pa tratamentu di e kaso aki.