WILLEMSTAD— E siudadano di inisial W.I. i di 29 aña di edat tabata den sala di korte djarason 5 di ougùstùs 2026. El a keda akusá di a menasá bisiña ku machete. Esaki tabata dia 23 di novèmber 2025. W.I. a kana drenta kurá di bisiña di su mama ku machete den man i tabata zuai esaki riba matanan den e kurá. Ademas W.I a tira algun piedra i bòter riba e kas, gritando: “Mi ta mata Bo”. Ademas W.I. ta akusá di a destruí algun mata di e bisiña, stul di terasa i tambe a kibra 1 òf mas bentana di e kas.

E wes ku tabata enkargá ku tratamentu di e kaso aki ta señora mr. J.C.A.M. Los, e fiskal ku a hiba palabra na nòmber di Ministerio Públiko ta señora mr. S.M. Scheer i abogado pa e defensa tabata señora mr. A.M. Tromp.

Durante tratamentu di e kaso a krea e impreshon komo sifuera e siudadano W.I. tin problema ku orientashon i ku klaramente e ta dependé di guia profeshonal di parti di Klínika Capriles. Segun wes, mama di W.I. a rekonosé ku W.I a aktua robes versus di bisiña i ku el a drenta den nan kurá i a destruí matanan ku tabatin plantá den e kurá. Pues ku W.I a baha su rabia riba e matanan. E akusado W.I., en kambio a reakshoná bisando ku e kosnan den e kurá tabata kibrá kaba i ku ta inventá kos kontra dje puramente pa hink’é den un lus negativo. Asina ta ku na momento ku W.I. a bini na palabra, el a sigui splika ku el a bai pa sali na defensa di su mama. Enfin, mester a yama polis pa W.I, kendenan a arestá W.I bai kuné i tené será te dia 12 di desèmber (2025). Despues djei a laga W.I. den libertat bou di algun kondishon, entre otro ku e mester laga Klínika Capriles atendé kuné.

Interná den Klínika Capriles tambe W.I a hañ’é den problema, e lo mester a kore drenta kushina pa kue kuchú den lachi. Atrobe polis a bini pa bai ku W.I., anto ta na luna di mart ku a lag’é den libertat atrobe. Reclassering a trese den un rapòrt padilanti ku W.I. ta un siudadano sumamente kaprichoso, pasobra el a bolbe bai kas di su mama, siendo esei ta prohibí. Tambe el a ninga di bai FMA, bisando ku e no ta uza droga mas. Guia di sikólogo i sikiater mester kai aden pa yuda W.I. tene su nervio i agresividat abou. Segun rapòrt di Reclassering W.I. mester di tratamentu den un instituto será. A konstatá ku tin vários palabrashon ku W.I. no a kumpli kuné i esei ta hasi e situashon hopi ferfelu i difísil. Wes a puntra e akusado W.I si e ta dispuesto na koperá e biaha aki ku Klínika Capriles i komportá manera debe ser i W.I a sigurá ku e biaha aki sí. Fiskal a demandá un kastigu di 90 dia di kua 35 dia kondishonal, kitando e periodo ku W.I. a pasa den aresto preventivo. Tur esaki mará na un periodo di prueba di 3 aña. Ademas W.I mester aseptá guia di Reclassering i F.M.A.

Aparentemente W.I ta tumando su remedinan i asina ei su komportashon ta un poko mas mihó. Wes señora mr. Los ta di opinion ku mester warda pa duna sentensia, pasobra mester wak si por yega na un solushon ku Klínika Capriles promé. Dia 19 di ougùstùs wes lo dikta sentensia i ta bai sa presis kiko lo para di e akusado W.I.