Den dos siman mester bin klaridat riba kaso Ontvanger Trona

WILLEMSTAD— Alfonso Trona, Ontvanger di Kòrsou a bai korte pa tende kiko ta pasando ku su kaso pasobra ainda e ta na kas pendiente di e investigashon di OM. E kaso a keda trata den ‘raadkamer’ ku porta será. Punto ta ku te ainda Trona no sa mes kiko ta e akusashonnan kontra di Trona. Wes komisario ta disidí dentro di dos siman. Dilanti korte Trona a enfatisá ku e ta duna tur klase di sosten na investigashon ku ta kanando. Di e forma aki a keda konfirmá ku tin un investigashon kontra di Trona.

Dilanti palasio di korte sr. Trona i su abogado a duna un reakshon na miembronan di prensa presente. Den su propio palabranan Alfonso Trona a bisa ku esaki ta un situashon hopi inhustu ku e i su famia ta bibando pa hopi luna kaba. El a splika ku ta for di dia ku Javier Silvania a bira minister el a kuminsá ‘yag’ riba direktornan den sektor di impuesto. El hasi tur posibel pa daño nòmber i kibra integridat di e direktornan, tambe a tilda nan di ta duna trato preferensial. Ademas Trona a bisa ku periodista Dick Draaier a publiká informashon ku nòmber di hende den prensa, miéntras ku tur informashon den Ontvanger ta sekreto. Pues kon i di ken e periodista a haña e informashon konfidensial aki? E ta spera ku e aktual minister ta laga investigá ken a saka informashon konfidensial for di Ontvanger. Trona ta konvensí ku ta e konsultent, ku tabata man drechi di Silvania kende ta sr. Wim Nijdam, asina el a deklará dilanti palasio di korte. Trona a kòrda tambe ku minister Hato a pidi despensa ku e fiskal a saka komunikado di prensa ku informashon robes na momentu ku a publiká ku Ontvanger ta duna areglo di pago di 200 aña, ku despues OM mester a rektifiká.

Alfonso Trona ke pa bini aklarashon. Na final Ontvanger a splika ku el a hasi ‘aangifte’ kontra di SOAB na ‘Accountantskamer’, anto no ta asina ku a bari su petishon for di mesa manera Silvania a bisa anteriormente. No a trata su petishon debí ku no a paga 70 euro na ‘griffiekosten’. Dentro di dos siman por spera klaridat den e kaso aki.

TvDirect