ARUBA: 4 detenshon relashoná ku tiroteo di djadumingu pasá

ORANJESTAD— Polisnan a sigui ku investigashon despues di un kaso di tiramentu ku a tuma lugá djadumingu 21 di yüni 2026 dilanti di Pacifico Restuarant na San Nicolas, Aruba. A base di esei outoridatnan a tene un entrada hudisial den Caya St. Maarten, den oranan di mardugá di djabièrnè. A hasi uso di e tim di aresto, Unidat di K-9 i polis uniformá di San Nicolas. A hasi 4 detenshon.

Manera indiká, e investigashon ta relashoná ku un kaso di tiramentu dilanti Pacifico Restorant. Riba e dia konserní, sentral di polis a manda un patruya pa e sitio menshoná pa mas o ménos 3:55 pm. Segun e informe inisial, lo mester tabatin dos outo envolví den e kaso aki. Ta trata di un Nissan March kolo blou i un Toyota Altezza kolo shinishi. Na yegada di polis no a topa e outonan mas na e lugá dje delitu.. Polis a kontrolá rònt i a bin topa ku hulsnan pero tambe perforashon di bala.

Diferente unidat di polis a kuminsá buska den e kayanan den e área pa wak si por topa ku e sospechosonan. Un ratu despues, den Caya Bonaire, polis a bin topa ku e outo Altezza kolo shinishi pará sin niun hende den dje. A konfiská e outo pa mas investigashon.

Departamento di recherche di San Nicolas a sigui ku e investigashon, trahando inkansablemente i djabièrnè mardugá a pone man riba 3 sospechoso. Ta trata di e hòmbernan: D.R nase na Aruba di 27 aña, L.T.D. nase na Aruba di 23 aña i K.R. ku tambe ta nase na Aruba di 18 aña.

Despues den oranan di mèrdia e otro sospechoso, hende hòmber, buska pa ku e kaso aki a presentá na warda di polis San Nicolas y a entrega su mes. Ta trata di M.P.Y. nase na Aruba di 17 aña. Kuerpo Polisial Aruba ta hasi un apelashon na esnan ku sa algu òf a wak algu pa yama e tiplijn di polis ku ta 11141. Bo ta keda anónimo.