KÒRSOU TA SIGUI INVIKTO NA WILLIAMSPORT!

WILLIAMSPORT— Un bia mas nos muchanan di Kòrsou, hungando beisbòl, a sabi di logra tremendo viktoria. Esei tabata e kaso awe djadumingu 23 ougùstùs 2026, den un partido kontra di Sur Korea. Den e partido aki Kòrsou a sali viktorioso ku un skor mínimo di 1-0.

E úniko kareda di e wega a drenta den promé entrada. Pitchernan Juriënsly De Windt i Giendry Ryan a dominá e partido i a kombiná pa un ‘shutout’, ku un total di 10 ‘strikeout’.

Esaki ta nifiká ku Kòrsou ta sigui invikto den e Little League World Series:

Kòrsou 6 – Hapon 0. Den e partido ei Kòrsou su muchanan no a permití ni un kareda i a gana di Hapon.
Kòrsou 1 – Korea del Sur 0.

Despues di dos partido, Kòrsou no a permití niun kareda. E muchanan a logra dos shutout konsekutivo kontra dos pais ku un tradishon fuerte den beisbòl.

E próksimo partido ta kontra Nikaragua. Esei ta tuma lugá djarason, 26 di ougùstùs i ta kuminsá 1:00 p.m., ora di Kòrsou.