E manera kon manehá kresementu turismo lo determiná futuro turístiko

WILLEMSTAD— Futuro turístiko di Kòrsou no ta determiná di antemano. E rumbo lo dependé kon manehá e kresementu durante di e próksimo añanan, asina e rapòrt Tourism Carrying Capacity Study ta revelá. Curaçao Tourist Board(CTB) i Ministerio di Desaroyo Ekonómiko(MEO) a duna enkargo pa traha e estudio aki na 2025. Sustainable Travel International i The George Washington University a realis’é, a base di datonan kolektá i aporte di partidonan interesá.

Pa mustra e implikashonnan di aserkamentu diferente e estudio ta presentá tres posibel trayekto:

Kresementu dirigí pa oferta: Esaki ta enserá kontinuashon di e tendensianan aktual, kaminda forsanan den merkado ta determiná desaroyo pa gran parti. E senario aki ta resultá den un kresementu ekonómiko mas haltu, pero tambe e ta sòru pa e karga di mas pisá riba infrastruktura, medio ambiente i komunidat.

Kresementu dirigí: Un manera kontrolá di manehá kresementu, kaminda ta adaptá desaroyo na kapasidat di e sistemanan. Kresementu ta kontinuá segun un trayekto kla, ku ménos preshon riba e sistemanan komo resultado.

Kresementu posponé: Un ekspanshon mas poko poko, tumando un pousa temporal den proyektonan nobo, pa duna e sistemanan tempu pa pone nan mes na altura. E senario aki ta redusí peso di mas di e sistemanan di e manera mas efektivo, pero ta limitá benefisionan riba término kòrtiku.

Segun e investigadónan, e konklushon ta kla! Si e tendensianan aktual sigui, Kòrsou ta drenta den sirkunstansianan di riesgo haltu, ku ta pone bienestar di komunidat i e atrakshon turístiko di e isla na peliger, i ta hala Kòrsou mas serka di turismo eksesivo. Kresementu dirigí ta eksigí desishonnan firme, pero ta mantené e impaktonan dentro di límitenan mas sostenibel, miéntras ta protehá e oportunidat ekonómiko riba término largu ku turismo ta representá.

E estudio konserní ta indiká ku turismo ta representá aktualmente kasi un tèrsio di Produkto Interno Bruto (PIB) di Kòrsou. E refnan, playanan i identidat kultural ku ta hasi e isla atraktivo pa bishitá, ta meskos e elementonan ku ta hasi e sifra aki posibel. E kresementu den añanan resien tabata konsiderabel. Pa 2024, e impakto ekonómiko total di turismo a subi di US$ 1,8 mil mion na 2019 te na US$ 2,7 mil mion. E kantidat di turista ‘stay-over’, ku a keda drumi na Kòrsou a yega na 700.242, loke ta un oumento di 50% kompará ku e nivel promé ku Covid, ku tabata 463.683 na 2019. Turismo di krusero tambe a alkansá sifranan record, ku hopi bishitante ta yena lugánan importante durante dianan di mas moveshon.

Ku e ritmo akí, Kòrsou ta riba kaminda pa yega na 1,5 mion turista ku ta keda drumi pa 2030. Komo komparashon, Aruba a tarda 24 aña pa oumentá su kantidat di turista ku ta keda drumi, di 800.000 na 2000 te na 1,4 mion na 2024. Kòrsou lo yega na e nivel akí hopi mas lihé, loke ta laga poko tempu pa invertí den preparashon di e sistemanan pa nan por resistí un entrada asina rápido di bishitante.

Segun e investigadornan, e kresementu akí ta yega den un sistema ku ya ta funshoná kasi na su límite. E evidensia a mustra ku e sistema di awa sushi no ta sufisiente, ku konsekuensia ku mayoria di awa sushi ta bai direktamente den laman sin tratamentu. E úniko depósito di zeta sushi ta serka di yega na su kapasidat máksimo. E kapasidat di aeropuerto ta serka di yega na su límite. Esakinan no ta problemanan separá. Nan ta síntomanan konektá di un desbalanse fundamental: e sistemanan di e isla no por sigui ku e nesesidatnan di komunidat i ku e eskala di turismo ku e isla ta risibí.

Pa 2030 Kòrsou por yega 14.91 bishitante pa kada abitante, miéntras Aruba tin kaba 21.4 bishitante pa kaba abitante

Na 2024, Kòrsou a risibí 9,85 bishitante pa kada habitante, kasi dòbel di e norma sostenibel segun ‘benchmark 5’. Pa 2030, e proporshon ei por subi te na 14,91 bishitante pa kada habitante, loke lo pone e isla serka di nivelnan di turismo eksesivo. Pa duna un idea, Aruba, ku hopi biaha ta wòrdu menshoná komo un ehèmpel di turismo eksesivo, tin un proporshon di 21,4 bishitante pa habitante.

Turismo ta sigui krese, pero e modelo aktual no ta logra transformá e kresementu na bienestar lokal na mesun ritmo. Mas ku mitar di loke bishitantenan ta gasta no ta keda riba e isla. Mas o ménos 58% di gastunan turístiko ta sali for di ekonomia.

E plaka ta sali via empresanan den propiedat di stranhero, produktonan importá i kadenanan di suministro eksterno, en bes di sigui sirkulá den ekonomia lokal.

E gastu di bishitantenan ta bou di e promedio regional. Na 2024, turistanan ku a keda drumi a gasta un promedio di US$ 231 pa dia, ménos ku e promedio regional di US$ 242. Pasaheronan di krusero ta kontribuí ainda ménos. Na Kòrsou nan ta gasta US$ 78 pa dia, hopi bou di e promedio regional di US$ 105.

Na mesun momento, e oferta di akomodashon a krese ku 81% desde 2019, mas lihé ku loke infrastruktura por sostené. Ademas, e industria ta bira mas dependiente di trahadó stranhero, loke ta pone mas preshon riba bibienda, kamindanan i servisio públiko.

E resultado ta un desbalansa ku ta sigui krese: e preshon riba e sistemanan ta oumentá mas lihé ku e benefisionan ekonómiko lokal ku mester hustifiká e kresementu ei.

Habitantenan ta sinti e desbalansa akí tur dia: den tráfiko, den gastunan di bibienda i den e sentimentu ku e isla ta keda diseñá kada bes mas pa bishitantenan, en bes di pa e personanan ku ta biba akinan.