Wardakosta a konfiská boto ku droga

ORANJESTAD— Wardakosta ta informá ku djarason anochi e avion di Wardakosta a detektá un kontakto sospechoso ku tabata nabegando den direkshon di Aruba. Wardakosta mesora a dirigí algun unidat di Metal Shark di Wardakosta den direkshon di e kontakto sospechoso. E kontakto sospechoso a keda identifiká komo un boto ku tabata transportando bultonan ku droga abordo. Wardakosta a start ku un persekushon y durante di e persekushon a los algun tiru di atvertensia den laira pa obligá e kapitan di e boto stòp e boto. E boto di patruya a interseptá e boto sospechoso y hiba e boto na e pir di Wardakosta. Una bes ku a yega na e pir di Wardakosta e 2 sospechosonan Venezolano y e paketenan ku supstansia ilegal a keda entrega na Kuerpo Polisial di Aruba. Entretantu e droga a ser destruí. E kaso ta den investigashon y Kuerpo Polisial di Aruba no ta deskartá posibilidat pa mas detenshon.