WILLEMSTAD—Ampliamente a para ketu den sala di korte djabièrnè 31 di yüli riba dudanan serio ku Ministerio Públiko a ekspresá riba orígen di e rikesa i sumanan kuantioso ku un komersiante chines di fam FENG ta disponé di dje, ya ku no tin aklarashonnan konvinsente pa splika di unda e rikesa akí a sali. Un lista largu di terenonan na Kòrsou Ministerio Públiko a presentá ku FENG lo ta doño di dje, pero ku no por splika di unda tur e plakanan ei a sali pa e por a bira doño i kon tur kos a bai. Komo tal e kabayero aki, ku e fam FENG (un di e magnatenan grandi di plaka na Kòrsou bou di e komunidat chines aki) di parti di Ministerio Públiko en prinsipio a keda akusá di:

(-) labamentu di plaka durante e periodo 1 di ougùstùs 2011 te 15 di ougùstùs 2017,

(-) No a hasi ‘aangifte’ na ofisina di impuesto durante e periodo 1 di yanüari 2011 te 1 di yanüari 2019 pa loke ta su entradanan.

(-) Violashon di e ordenansa Nashonal riba Supervishon di ‘Bank- en Kredietwezen’.

(-) Violashon di e ordenansa Nashonal riba Supervishon di Ofisinanan di Transakshon di Plaka.

Klaramente a bini padilanti durante tratamentu di e kaso aki den sala di korte ku Ministerio Públiko a kana hinter un kaminda di krus, inkluso ku sierto investigashonnan hasí na China, pero no a keda kla. Ministerio Públiko no a logra establesé ku FENG ta totalmente fuera di lei i ku enbèrdat a hasi kosnan robes pa por a bira riku.

E kabayero di fam FENG, kende aktualmente ta esun akusá pa Ministerio Públiko, a trese padilanti ku su herensia ta bin for di su tata, kende ya no ta na bida mas. E tata di FENG, segun loke a keda tresé padilanti tabata un komersiante ku tabata doño di un negoshi di palu na China ku tabata masha eksitoso mes. Pero na sierto momento a disidí di bende e negoshi aki i sali for di China bini Kòrsou ku tur e biyetenan di plak na su kurpa. Asina ei e tata a drenta Kòrsou. Pues ta e persona aki ta e esun ku a akumulá e rikesa ku despues na Kòrsou a sigui traha riba dje i krese bai. E akusado FENG, kende aktualmente ta e herdero a deklará ku tempu ku su tata tabatin e negoshi i ku esaki a drenta Kòrsou ku e plakanan di plak na su kurpa e tabata un mucha di apénas 11 aña edat, pues e no por responsabilisá kon kosnan a bai. Ainda na China nan tin 17 apartamentu di kua nan ta doño i na Kòrsou entre tantu tambe un kantidat di tereno i negoshi ku plaka na granèl. Plaka ta lora manera greis den e famia FENG. Tambe Ministerio Públiko a tuma nota di transakshonnan di sumanan di plaka ku tabata drenta riba nan kuenta for di China, kada biaha tabata porshonnan di plaka ku no tabata surpasá e kantidat ku outoridatnan na China tabata pèrmití i tur esaki a yuda forma e base fuerte pa nan rikesa awe. No tin duda ku e kaso aki ta unu sumamente kompliká i tin mas nòmber menshoná, pero kendenan no a keda persiguí. Ademas e kaso aki ta keda relashona ku mas di e susesonan ku tabata den korte manera robo di baranan di oro den e kaso di e barku Summerbliss, investigashon Avior etcetera. Tin di esnan envolví ku Ministerio Públiko a sera ‘deal’ kuné, pa laga tur kos keda te ei.

Enfin, na e kaso aki tin mas fail konektá ku al final nada no ta bai sosodé, lo no bai tin ningun persekushon. Abogado señora mr. Marije Vaders kende ta enkargá ku e defensa di FENG den sala di korte, a pasa maestralmente riba kantidat di detayenan pa mustra tantu riba inkonsistensia komo inkompetensia di parti di Ministerio Públiko den tur e asuntunan aki. Segun e abogado klaramente tin faltamentu ku prinsipionan di igualdat di manera ku ta parse ku tin tendensianan deskriminatorio den e totalidat ta hunga un ròl.

Fiskal mr. de Graaf na nòmber di Ministerio Públiko a trese padilanti ku kosnan no a kana di forma korekto di parti di FENG, pero ku e investigashonnan te asina leu no a produsí rasonnan kontundente pa yega na persekushon. Suavemente bisá e fiskal a proponé pa laga e asuntu aki sosegá numa i pa loke ta debenan di belasting ku FENG lo mester paga djis un parti. Pero, e fiskal no ta na fabor pa imponé kastigu ni oumentá e sumanan ku FENG lo mester paga na belasting. E kaso aki ta unu bieu ku lo no mester sigui pa bai bèk te den pasado, pasobra muchu aña a pasa entre tantu. Wes señora mr. E.J. van Rijssen a konkluí ku dia 5 di ougùstùs binidero lo e dikta e sentensia pa mitar di 2 di mèrdia.