Relato polisial di último oranan

Di e forma aki Clarity News ta ofresé na lesadónan algun notisia polisial ku a kousa mas impakto den último oranan.

Ladronisia piesa di outo

Pa kuminsa, polis ta informa ku den oranan di mardugá di 24 di yüni 2026, a tuma lugá un ladronisia di piesa di outo for di un Chevrolet Spark i tambe un Kia Picanto na Telemonstraat. Polis ta disponé di videonan di dos hòmber ku a hasi nan mes kulpabel na e ladronisianan aki. E petishon ta bai na tur siudadano ku por tin informashon di e kasonan aki of por rekonosé e dos sospechosonan riba e imágennan, pa tuma kontakto ku polis na 917 of duna informashon na polis via di e liña anónimo 108.

Detenshon hoben (17)

Relashoná ku investigashon den un kaso di ladronisia di skuter ku a tuma lugá den área di Prinsenstraat (Punda), polis a hasi un detenshon mas. Djaweps 16 di yüli 2026 alrededor di 06.21’or, polis a detené e hòmber N.Z.P.T. di 17 aña di edat nasé na Kòrsou, pa ladronisia di skuter. Su detenshon a tuma lugá den Kaya Zim. A presentá e sospechoso dilanti di un fiskal ouksiliar ku a ordená su enkarselamentu pendiente di mas investigashon.

A detené ladron di skuter

Djárason 15 di yüli 2026 alrededor di 12.15’or, e tim ku ta enkargá ku investigashon di ladronisia di vehíkulo a hasi un detenshon. Kontinuando ku investigashon relashoná ku ladronisia di dos skuter ku a tuma lugá den Telamonstraat, e tim enkargá ku e investigashon a detené e hòmber G.G.B. di 17 aña di edat nasé na Kòrsou. Su detenshon a tuma lugá den área di un sentro komersial na Veeris. Durante di e ladronisia e malechornan a bai ku pòtmòni i nan a hasi uso di un karchi di bankomátiko kaminda tabata ‘tap’ esaki na vários toko. No ta ekskluí mas detenshon den e kaso aki. A presentá e sospechoso dilanti di un fiskal ouksiliar, ku a ordená su enkarselamentu pendiente di mas investigashon.