Riba 14 aña kastigu pa atrako Casino Aqua

Sentensia di 2 dominikano i 1 haitiano

WILLEMSTAD— Djabierne 10 di yüli korte a dikta sentensia den e kaso di atrako ku arma di kandela ku a tuma lugá dia 23 di mart 2025 den Aqua Casino den Otrobanda. Ta un kaso ku su tratamentu a tuma hinter un dia, kuminsando for di mitar di 10 di mainta te mitar di 8 di anochi. Remarkabel ta ku mesora a surgi rumornan persistente ku lo mester ta trata akí di un ‘inside djòp’, pasobra e orario mainta trempan, na porta kaminda trahadónan so tin pasashi pa drenta e casino, ta muestra ku tur kos tabata debidamente planiá i ku kada atrakadó tabata bon na altura kon mester aktua.

Finalmente e dos dominikanonan Juan Gonzalez i su ruman  Manuel Gonzalez a haña kastigunan di prizòn di respektivamente 6 aña i 5 aña, siendo e hòmber haitiano Jackson Francois (konsiderá e ‘brain’ tras di e akto kastigabel aki) a haña apénas 40 luna di kastigu di prizòn, pasobra wes a opiná ku ta e dos dominikanonan a ehekutá e akto kastigabel kometé i no Jackson Francois, ni tampoko por proba ku ta e ta e ‘brain.

Riba vidio ku a pasa den sala di korte por a mira 2 outo, 1 S.U.V. koló shinishi skur i 1 otro outo kòrá (Seat Ibiza) ta kore bai bini den serkania di e kasino, orientando algun ratu promé ku e atrako tuma lugá. Despues por a mira imágennan di e atrako mes manera esaki a sosodé, ku e atrakadónan drentando e kasino, ku arma di kandela den man i karanan tapá, poniendo un dama i un kabayero plat abou na suela, habri kluis saka plaka bai kuné.

Tambe a pasa un filmashon kaminda a bai kumpra portofon den e negoshi Señor Barata, ku e atrakadónan akí a uza pa kometé nan akto di ladronisia. Ta trata akí di un suseso hopi violento, poniendo arma di kandela na kurpa di e trahadónan, esta e atrako harmá ku armanan di kandela.

Esun konsiderá di a hinka e atrako akí den otro, palabrá loke a sosodé ta e hòmber haitiano J. Francois, gran baidó di e kasino, doño di un snèk, anto alabes esun ku a kumpra e outo kòrá (serka un tal Jezus) kual vehíkulo tambe a uza pa tira e atrako. Pero wes señora Hubben den e sentensia a opiná ku no tin sufisiente prueba ku ta Jackson Francois ta e outor intelektual di e akto kastigabel.

Segun fiskal señora mr. V. Girigoria-Hernandez, Ministerio Públiko ta sali for di e punto di bista ku por lo ménos 5 persona ta metí den e kaso akí, pero djarason 10 di yüni, dia ku tabatin tratamentu di e kaso, ta solamente 3 akusado tabata presente, kendenan ta 2 persona di orígen dominikano i 1 haitiano. Pa kolmo e 2 dominikanonan ta ruman di otro M. Gonzalez-Cabreja di 45 aña di edat (alias Richard), J. A. Gonzalez di 48 aña di edat, alias ‘Chamo Pistola’ i J. Francois (haitiano) di 52 aña di edat. 

Tres hòmber harmá a kana drenta e kasino, siendo, un di kuater persona tabata warda den e outo kòrá Seat Ibiza.  Shofùr di e vehíkulo akí te ainda no ta konosí. E di 5 siudadano metí den e kaso akí tabata for di prinsipio esun ku tabata tira bista. Segun Ministerio Públiko ta Francois esun ku tabata manehá e outo akí.

E botin ta un suma konsiderabelmente haltu, e ta riba 400.000 florin, tantu den florin komo dòler merikano kontá huntu. Despues di e robo violento akí e atrakadónan a kore den e outo Seat Ibiza, bai for di e sitio, pa despues laga e vehíkulo akí patras na Piscadera. Hopi papiamentu tabatin rondó di e komportashon di e akusadonan, esta dispidimentu di plaka pa loko. E haitiano por J.ackson Francois por ehèmpel direpente a bin ta hunga sumanan grandi di plaka den e mesun kasino akí. En kambio e dominikano Juan .A. Gonzalez a bin ta hunga grandi ku kumpramentu di outo nobo, hasiendo komo sifuera ta BIG SHOT e ta. Manuel Gonzalo-Cabreja, esei a biaha bai Santo Domingu. Enfin, tur e komportashonnan straño akí a krea komentario i enorme spekulashon rondó di e hendenan akí.

E atrakadónan tabata komuniká ku otro na spañó i papiamentu. Ademas a tene bon kuenta pa por a kapta detayenan di postura, koló di kueru i bos, estilo di kana etcetera. Ademas a hasi uzo di imágennan di kámara i telefònnan pa krea un investigashon ku por duna bon resultado. Fiskal a demandá un kastigu di prizòn di 7 aña pa kada atrakadó, kitando e periodo ku a pasa den aresto preventivo. Tambe fiskal a proponé pa bai di akuerdo ku e suma di 2000 florin di daño i perwisio pa un di e trahadónan.

Nòmber di un tal Jason tambe a kai komo un di e sospechosonan ku ainda no a logra pone man riba dje. Tambe fiskal a sigui menshoná kantidat di nòmber di siudadanonan ku a keda interogá. E abogadonan enkargá ku e defensa tabata señora mr. A. Pergault Monte pa e akusado Juan .A. Gonzalez, mr. R. E. Martis pa e akusadoManuel  Gonzalez-Cabreja, finalmente pa e akusado Jackson Fancois tabata abogado mr. U. Dickens.

Wes señora mr. M.C.B. Hubben a dikta sentensia dia 10 di yüli i a konkluí ku e dos dominikanonan Juan Gonzalez i su ruman Manuel Gonzalez ta haña kastigunan di prizòn di respektivamente  6 aña i 5 aña, siendo e hòmber haitiano Jackson Francois apénas 40 luna di kastigu di prizòn.