Salu Power Plant planta nobo di Aqualectra den konstrukshon

WILLEMSTAD – Dia 4 di yüni ultimo, Aqualectra a tene un bríndis pa selebrá un paso sumamente importante den Kòrsou su futuro energétiko; e kompania a yega e punto di mas haltu den konstrukshon di su planta nobo di koriente Salu Power Plant. Esaki ta mas ku djis progreso, e ta un momentu importante ku ta duna kontenido na Aqualectra su kompromiso pa konstruí un infrastruktura di utilidat fuerte i resiliente pa Kòrsou i sirbi e komunidat aki fundamentalmente.

E akuerdo pa konstrukshon di e planta di koriente a keda firmá ku Wärtsilä den e último kuartal di aña 2024 i for di den transkurso di aña 2025, a kuminsá ku e promé avansenan den konstrukshon di Salu Power Plant. Salu Power Plant ta diseñá komo un planta di koriente ‘future proof’ ku pronto ta bai reforsá Kòrsou su ret di koriente ku un total di 40 MW inkluyendo dos transformator di koriente sofistiká di 50 MVA (Mega Volt Ampere). Ku e kresementu ekonómiko i turístiko di e isla aki, pero tambe faktornan manera kambio di klima global, demanda pa koriente stabil i konfiabel tambe ta sigui krese.

E planta akí, huntu ku por ehèmpel, e mulinanan di bientu, e Sistema di Almasenahe di Energia pa medio di Bateria (BESS) i e Sistema pa Maneho di Energia (EMS), ta yuda trese kambionan fundamental den produkshon i distribushon di koriente na Kòrsou. Aqualectra lo tin mas kapasidat di produkshon i esaki lo yuda di tal forma ku na tur momentu, asta ora demanda ta haltu, e servisio na e kliente por ta stabil. Tambe, e planta ta bai hasi posibel pa Aqualectra mantené un skèdjel di mantenshon konsistente durante henter aña pa tur mashin den produkshon. Esaki, mirando ku ora demanda ta haltu, mashinnan mester a drai èkstra i konsekuentemente tin bia tabata asta stroba e skèdjel di mantenshon pa e mashinnan akí. Tur e diferente esfuersonan akí, ta yuda Aqualectra ekspandé su kapasidat, tantu konvenshonal komo renobabel i sigui mehorá e kalidat di e servisio. Aparte di a yega e punto di mas haltu den konstrukshon di Salu Power Plant, den e simannan tras di lomba Aqualectra eksitosamente a transportá e kuater motornan di Wärtsilä ku lo bai operá na e planta akí i instalá esakinan na nan un lugá den e planta. Kada un di e motornan akí tin un kapasidat di 10 MW. Konstrukshon ta sigui progresá ku pasonan firme i Aqualectra ta spera ku pa e último kuartal di e aña akí, e promé kWh lo sali for di Salu Power Plant.

Salu Power Plant ta un invershon importante den Kòrsou su futuro energétiko. Ku kada paso, Aqualectra su enfoke ta seguridat energétiko, kontinuidat i stabilidat operashonal i bienestar a largo plaso pa kada kas i negoshi na Kòrsou.