WILLEMSTAD – Un hòmber kolombiano di fam de la Espriella Jimenez, kende tin 40 aña di edat, tabata den sala di korte dia 29 di aprel último. Tabata dia 20 di desèmber 2025 ku outoridatnan a tene un kòntròl grandi den tráfiko riba Pater Eeuwensweg na altura di rotònde Ergilio Hato (serka di Corendon). Segun shofùr di e outo Hyundai Kona, ku e plachi di number W 69-20, manehá pa e kolombiano, el a kaba di sali un fiesta di empresa na e momento ei. Na e fiesta aki, e akusado a dal beter, komo tal enbèrdat e tabata hole alkohòl. Polisnan a someté e hòmber na tèst di rosea i el a marka 770 mikrogram ku ta 3 biaha e kantidat ku ta permití den tráfiko.  

Promé e akusado a deklará ku ta shampaña el a bebe, pero despues el a atmití ku el a dal algun wiski Chivas tambe. Wes a puntra e hòmber dikon el a kore outo, no opstante ku e tabatin bastante beter den su kurpa. Kore outo bou di influensia di alkohòl ta enserá un riesgo ku por tin konsekuensianan fatal, e wes a sigui splika mas aleu.

E akusado a reakshoná, bisando ku normalmente e no sa kore outo bou di influensia, pero e biaha akí sin duda el a tuma un desishon robes. Den sala di korte e akusado a pidi despensa. Fiskal señora mr. Scheer a demandá un but di 1600 florin di kua 300 florin kondishonal, mará na un periodo di prueba di 3 aña. Tambe  de la Espriella Jimenez ta pèrdè su reibeweis pa 3 luna i e ta obligá pa sigui un training riba komportashon responsabel den tráfiko, organisá pa e organisashon Tráfiko Sigur i bou di ouspisio di Reclassering. Wes mr. Sigmar Carmelia a bai kompletamente di akuerdo ku e demanda di fiskal i a yega na e mesun veredikto ku e demanda.