WILLEMSTAD – Parlamentario Rutmilda Larmonie-Cecilia a pidi atenshon urgente di minister enkargá ku salubridat, esta minister Boekhoudt pa situashon ku tin pueblo molestiá di hospital CMC. E parlamentario a bisa, durante di e reunion kaminda gabinete Pisas 3 a presentá e programa di gobernashon, ku mester atendé ku situashonnan den salubridat.

Segun parlamentario Rutmilda Larmonie-Cecilia, ketu bai tin lista largu di espera pa diferente disiplina den medisina loke ta nifiká ku pashèntnan mester warda hopi luna promé ku haña kuido médiko nesesario. E situashon aki mester haña e atenshon di gobièrnu pa trese solushon aseptabel. Otro asuntu ku tambe mester haña atenshon ta e sumanan ku hospital CMC tin mester pa por operá.

Loke ta birando un situashon di molèster ta ku nos poblashon no a kustumbrá ku den hospital ta pone hende muhé i hende hòmber drumi huntu den mesun kamber. E parlamentario ta bisa ku el a bai hasi bishita na un pashènt i a tende reklamo di hendenan. E situashon aki ta kousa molèster serka siudadanonan. Pashèntnan no ta eksperensia esaki komo algu agradabel. E parlamentario ta puntra minister Boekhoudt kiko por hasi na esaki.