Momentunan sumamente doloroso un siudadano di fam Suarez a pasa sintá den sala di korte pa splika di kua manera el a bini na un revòlver mas chikitu ku un paki di sigaria. Tratamentu di e kaso akí a tuma lugá djarason 1 di aprel, kaminda e akusashon ta violashon di e lei di arma di kandela dia 12 di desèmber 2025. E siudadano Suarez (36) tabata koriendo su outo di un forma ku polisnan a konsiderá hopi nervioso. Pa tal motibu polisnan a disidí di par’é i pidié baha un ratu for di e vehíkulo.

Polisnan mesora a indiká ku ta trata akí di un kòntròl rutinario. Den un tas pretu ku tambe tabata den e vehíkulo, polisnan a bin reis riba un mini revòlver di e marka North American Arms Corp, modelo Derringer, kaliber 22. E akusado Suarez a splika wes ku serka un konosí di dje el a bai kue un djòp di hisa shushi, ruim op e kuarto di un famia ku a fayesé. Suarez tin un vehíkulo ku e sa uza pa  transportá opheto i artefaktonan pa benta afó. Pero, segun nan tabata ‘ruim op’, nan a topa ku un revòlver ku tabata pertenesé na e defuntu. E arma tabata den lachi di un kashi, pero Suarez mesora a demostrá interes i a pidi pa e keda ku e arma di kandela ku den su bista a parse algu hopi inosente, mas bien un artefakto ku el a konsiderá puramente antik. Maske un amigu presente na e sitio a atvertí, Suarez a tuma e arma di kandela i a bent’é den un tas pretu ku e sa tin den outo.

Repasando tur loke a sosodé te pa el a kai será pa motibu di e arma di kandela, e akusado Suarez tabata yora, splikando ku nunka e por a kere ku e lo hañ’é den un situashon asina teribel ku hasta el a kai será, kedando tan aislá for di su famia pa motibu di algu ku el a konsiderá un artefakto bieu ku no tin ningun balor. E arma di kandela, segun Suarez, hasta ta kibrá i ta asina chikitu! Polisnan, esta e departamentu tékniko sinembargo a konstatá ku e arma di kandela ta den perfekto kondishon, komo tal por sirbi debidamente pa hasi daño na kualke siudadano.

Den sala di korte a surgi e impreshon ku Suarez, ningun momento so no ta un siudadano problemátiko. E ta un tremendo tata di famia, bon ku su yunan (di 6 i 2 aña) i señora, ademas un trahadó fiel ku semper ta na su trabou na tempu. Simplemente bisá un hende desente ku a hañ’é den un problema ku kasi no por a premirá. Den sala di korte su doño di trabou tambe tabata presente pa sigui tratamentu di e kaso. Pa e doño di trabou akí, Suarez tan pronto ku e rekobrá su libertat, por regresá su trabou trankil numa.

Fiskal señora mr. K. Hara a puntra e akusado si e ta haña ku e meresé kastigu i mesora e akusado akí a reakshoná, bisando ku nò. Wes mr. Sigmar Carmelia a sinti mesora ku mester koregí Suarez, yamando atenshon riba e hecho ku aki ta trata di un arma di kandela, pues e ta debidamente den violashon, aktuando kontra di lei. E mini revòlver aki, di kaliber 22, tabata kargá ku 4 bala. Mas aleu tantu wes komo fiskal a yama atenshon pa e situashon sumamente peligroso di armanan di kandela den sirkulashon aki na Kòrsou. Teniendo hopi konsiderashon ku e akusado Suarez i konvensí ku no ta trata aki di un siudadano di mal kurason, fiskal a demandá un kastigu di prizòn di 18 luna di kua 8 luna kondishonal, kitando e periodo ku el a sinta kaba. Suarez no tin pasado ku hustisia i el a ekspresá di ta sumamente preokupá pa pèrdè e kas ku e ta pagando hipotek riba dje.

Wes mr. Sigmar Carmelia despues di un pousa kòrtiku a dikta sentensia i a imponé klaramente un kastigu di komprenshon pa e akusado Suarez. Wes a yega na e kondena di un kastigu di prizòn di 18 luna di kua 12 luna kondishonal, kitando e periodo ku Suarez a sinta kaba. Ta nifiká ku despues di 6 luna ku e akusado aki sinta, e por regresá kas bèk. Wes no a haña ta nesesario someté Suarez na guia profeshonal di Reclassering.