WILLEMSTAD – Parlamentarionan no mester krea mas konfushon bou di pueblo. Parlamentarionan tin tarea di eduká i elevá nivel di pensamentu den pueblo. Na palabra parlamentario Ramon Yung durante di e reunion di Parlamento ku a trata e programa di gobernashon di Gabinete Pisas 3.

Parlamentario Yung a bisa ku el a keda sorprendí di tende koleganan parlamentario bisa ku gabinete a presentá un plan sin sifra pa supstansia e maneho. Yung ta splika ku e gabinete a bai Parlamento pa splika e programa di gobernashon, pues kiko ta bai hasi den próksimo kuater añanan. No ta un reunion di presupuesto pa splika kuantu sèn ta bai gasta.

Yung a lamentá ku koleganan den Parlamento ta ‘kwek kwek’ i ta kousa konfushon bou di e poblashon pasobra pueblo ta kapas di kere ku den reunion ku ta presentá programa di gobernashon mester tin sifra pa kompañá e programa.