WILLEMSTAD–Pa tratamentu Pro-Forma e siudadano di fam Winklaar, kende tin 27 aña di edat i ta nasé na Ulanda a presentá den sala di korte djarason 8 di yüli 2026. Un total di 6 akusashon tin kontra di e notorio Winklaar aki. Ta trata aki sin duda di un siudadano ku serka hustisia ta konsiderá komo un figura ku un trayektoria bastante ferfelu i kompliká ya ku den pasado e tabata envolví den kasonan bastante trágiko.

(1) Pero awor Ministerio Públiko a deklará ku ta trata aki di e akusashon ku dia 6 di desèmber 2025 Winklaar a kometé ekstorshon kontra di un siudadano di fam Vrutaal, kende Winklaar a menasá ku e lo sefta esaki su outo ku balanan for di un arma di kandela, ku e tin gana di pasa 2 bala den esaki su kabes, ku e no ke tende nada mas i ku dia 20 di desèmber 2025 e ta pasa pa tuma e suma di plaka (Cg 10.000), anto ku e víktima mester paga masha tinu pa no bisa polis ni ningun otro persona nada.  Na vários okashon, esta riba dianan 7, 13 i 18 di desèmber 2025 Winklaar a manda whatsapp pa Vrutaal pa rekòrd’é riba e suma di plaka. Dia 18 desèmber 2025 Winklaar a manda un whatsapp pa Vrutaal den kua e ta bisa ku e dia siguiente e ta pasa pa tuma 1/3 parti di e suma di plaka.

(2) E siguiente akusashon kontra di Winklaar ta ku dia 6 di desèmber 2025 el a maltratá Vrutaal dor di dal e ku e arma di kandela den man na su banda di kara robes i ademas el a batié ku moketa den kara.

(3) Mas akusashon kontra di Winklaar ta poseshon di arma di kandela dia 6 di desèmber 2025, esta un pistol Glock kaliber 9 x 19 mm ku e munishon korespondiente.

(4) Intento di asesinato dia 3 di desèmber 2025 kontra di un siudadano di fam Martina i su yu hòmber. Segun e dokumentonan di Ministerio Públiko a tira ku arma di kandela riba un Suzuki Ignis ku tabata stashoná den kurá di kas di Martina.

(5) Atrako ku arma di kandela kometé dia 5 di desèmber 2025 pa kita kadena i tas for di un siudadano di fam Celestijn. Na e okashon aki a pone un arma di kandela na kabes di Celestijn.

(6) Ladronisia di un outo shinishi Kia Sportage ku e plachi di number D 10-28 ku ta pertenesé na un siudadano di fam ZHONG.

Fiskal señora mr. Keller a mustra ku ta hasiendo tur esfuerso pa tratamentu di e kasonan aki keda tratá dia 9 òktober binidero, pero ya a konstatá ku testigunan ku mester keda skuchá ainda, tin miedu di duna deklarashon kontra di Winklaar. Ademas tin un kaso di violashon di un hende muhé ku a keda sekuestrá. Mester kaba di investigá kiko a sosodé presis. Mas aleu fiskal a sigui splika ku ta pendiente tambe di rapòrt di profeshonalnan manera Reclassering, sikólogo etcetera. Finalmente wes señora mr. Los a konkluí ku tratamentu di e kaso aki riba kontenido lo ta dia 9 di òktober binidero.