Minister Cooper mester presentá prueba di alegashonnan sino rektifiká

WILLEMSTAD— E kompania Random Consulting Limited, a reakshoná riba e alegashonnan di minister Charles Cooper den medionan di komunikashon di Kòrsou. E kompania ta enfatisá ku ta trata di alegashonnan falsu. Den algun palabra e kompania ta bisa ku minister Cooper mester presentá prueba sino mester rektifika.

Ku su post riba Facebook i despues na vários radio i televishon minister di Finansa Cooper a lanta pregunta tokante e kontrakt entre Random Consulting Limited i Curaçao Gaming Authority (CGA). Ounke pa motibu di obligashonnan di konfidensialidat e kompania no por duna komentario riba e kondishonnan detayá di su akuerdo, nan ta konsiderá importante pa pone sierto informashon konkreto na konosementu públiko.

Kua tabata e enkagro

Random Consulting Limited ta apoyá CGA, anteriormente konosí komo GCB, for di 2022 ku desaroyo i funshonamentu di e teknologia ku ta forma base di e kuadro regulatorio moderno di weganan di hazar na Kòrsou. E kompania a diseñá i desaroyá e portal online di Kòrsou pa otorgamentu di lisensia, i ta sigui mantené esaki. E portal aki ta forma e struktura prinsipal di e proseso di otorgamentu i maneho di lisensia.

Ademas, Random Consulting ta pone un tim multidisiplinario dediká disponibel, ku ta kontribuí na e proseso di otorgamentu di lisensia. Esaki ta inkluí prosesamentu di aplikashon, maneho di fluho di trabou, sosten na esnan ku apliká i atministrashon di e sistema di lisensia.

E trabou a inkluí:

Desaroyo di e plataforma di lisensia NOOGH, lansá na novèmber 2023.

Diseño i implementashon di e plataforma nobo di lisensia, konosí komo CGA Portal, despues di introdukshon di Landsverordening op de Kansspelen (LOK) na desèmber 2024.

Hosting, mantenementu i sosten tékniko pa tur dos plataforma.

Sosten operashonal i regulatorio pa e proseso di otorgamentu di lisensia.

Desaroyo di un plataforma di monitoreo di dominio den tempu real, ku ta ser usá pa identifiká operadónan ku lisensia i pa revelá kualke wèpsait ‘fake’ ku pretendé di tin un lisensia di Kòrsou.

Na final di e akuerdo, e software desaroyá dor di Random Consulting lo pasa pa CGA. Asina e outoridat lo bira doño permanente di e sistemanan, sin tin ku sigui paga gastunan di lisensia pa e software.

Pago di honorario

For di kuminsamentu di su enkargo na 2022, Random Consulting a risibí un total di €3.426.406, repartí manera ta sigui:

2022: €15.406

2023: €0

2024: €884.250

2025: €2.526.750

E sifranan aki ta reflehá den e kuentanan anual depositá di e kompania.

Ta importante pa señalá ku, riba petishon di gobierno di Kòrsou, Random Consulting a bai di akuerdo pa posponé diferente pago durante e fase inisial di implementashon. Manera e sifranan ariba ta demostrá, esaki tabata pa sostené i fasilitá e lansamentu eksitoso di e kuadro regulatorio nobo. Esaki a tuma lugá durante un reunion ku hopi funshonario di gobièrnu tabata presente, inkluso señor Cooper mes.

E deklarashon di minister Cooper ku Random Consulting ta risibí XCG 8,3 mion pa aña ta kompletamente inkorekto i ta duna motibu serio pa preokupashon.

Entrada anual di CGA for di lisensia

Bou di e struktura di tarifa di LOK, un titular di un lisensia B2C ta paga €47.450 pa kada lisensia pa aña. Esaki ta ser fakturá i mester ser pagá manera ta sigui:

Tarifa di supervishon di CGA: €22.960 pa kada lisensia

Tesoreria Nashonal: €24.490 pa kada lisensia

Aunke e enkargo di Random Consulting a kuminsá na 2022, mas ku dos aña promé ku Landsverordening op de Kansspelen (LOK) a drenta na vigor dia 24 di desèmber 2024, e trabou realisá durante e periodo ei a pone e base teknológiko pa e kuadro nobo di lisensia di Kòrsou.

Na momento di publikashon di e komunikado di prensa aki, tin 617 lisensia ku, for di 2025, ta generá mas ku €29 mion pa aña, òf XCG 59,16 mion.

Ademas, CGA mester a risibí €4.952 pa kada lisensia komo tarifa di aplikashon. E sifra aki no ta inkluí tarifanan pagá pa aplikashonnan ku finalmente no a ser aprobá.

Petishon formal pa revelashon i korekshon

RCL awor formalmente ta pidi minister Cooper pa revelá:

E fuente di e deklarashon ku RCL a risibí òf kobra XCG 8,3 mion pa aña.

E dokumentonan i kalkulashonnan riba kua e deklarashon ta basá.

Si e informashon revelá a bin di CGA, Ministerio di Finansa òf un otro outoridat públiko.

Si tabatin outorisashon pa revelá e informashon.

Si e sifra ta inkluí montantenan no pagá, posponé, proyekta òf montantenan ku no tin relashon ku e akuerdo. Nan ke sa si e minister a verifiká e informashon promé ku publik’é.

A ménos ku presentá evidensia pa sostené e deklarashon, mester koregí esaki públikamente.