Edifisio misa pastor Balentina a pasa pa Gi-Ro Settlement

WILLEMSTAD— Un edifisio den Groot Kwartier ku ta sirbi komo misa, konosí komo misa di pastor Balentina, ta kambio di doño. Esei korte a dikta den un sentensia, den kua e doño original ku ta Curaçao Radio Station(CRS) i Hit 100.3 di famia Cijntje a resolvé nan debe na Gi-Ro Settlement Holding di 1.4 mion florin kontra loke Fundashon Iglesia Lluvia de Bendicion Curaçao ta debe CRS. E fundashon menshoná ta e misa di pastor O. Balentina kende mester a sinta kastigu di prizon despues ku korte a haña probá ku e tabatin komportashon inapropia ku mucha i hende muhé di e misa.

Esaki ta e historia ku a keda tratá den korte.

Curaçao Radio Station NV i Hit 100.3 tin un debe na Gi-Ro Settlement Holding na balor di Cg 1.4 mion florin. Sr. E.Cijntje ta esun responsabel pa tantu CRS komo Hit. Fundashon Iglesia Lluvia de Bendicion Curaçao su presidente ta sra. X.C Balentina-Verplaats. E presidente anterior ta sr. O.I.Balentina, konosí komo pastor Balentina.

Na 2006 e fundashon i CRS a sera un akuerdo kaminda Fundashon ta kumpra ‘zendtijd’. Mester a paga 12.500 florin pa luna. E transmishonnan a stòp despues di 18 luna. CRS i Hit a papia na 2012 pa e fundashon tuma e aparatonan i pèrmit di transmishon di Hit 100.3. Dia 1 ougùstùs 2015 a kuminsá ku e transmishonnan atrobe, 24 ora pa dia for di tèmpel di e misa.

6 yanüari 2016 CRS/Hit a skibi e fundashon splikando ku nan a risibí 40.000 florin pa kompra di Hit 100.3. Dia 7 yüli 2023 sr. Cijntje di Hit a skibi e fundashon ku tin un debe atrasá i a eksigí pago di e fundashon pa e debe habrí. For di ougùstùs 2015 e fundashon ta hasi uso 100% di e frekuensia Hit 100.3, kompará ku e situashon anterior. A konkluí ku tin 96 luna di 13.000 florin pa luna habri, esaki ta yega un total di 1.2 mion florin. E fundashon a paga solamente 447.775,- florin ke men te ku yüli 2023 e debe atrasá ta di mas ku 800 mil florin. Partidonan a negoshá via whatsapp entre febrüari 2024 – aprel 2024. Sra. Balentina-Verplaats a indiká ku debí na situashon finansiero e no por kumpli ku pago kompletu.

Na febrüari 2024 e fundashon a pidi RAC un pèrmit pa frekuensia di radio, i na yüni 2024 Hit 100.3 a manda spesifikashon di debe atrasá di mas ku 900 mil florin. Na yüni 2024 RAC a kontesta sra. Balentina-Verplaats splikando ku HIT 100.3 no tin e frekuensia mas. E pèrmit a vense 6 aña kaba i no a risibí petishon pa renobá esaki. Na sèptèmber 2024 sr. Cijntje a skibi e fundashon ku e debe a surpasá 900 mil florin i ku ta stòp transmishonnan. 1 sèptèmber 2024 a stòp e transmishonnan di e fundashon. Hit 100.3 a transferí nan derecho riba e suma menshoná na Gi-Ro settlement. E edifisio tambe ku ta riba e tereno di 1.571 m2 na Groot Kwartier.

Gi-Ro settlement a kuminsá na kobra e fundashon e suma di mas ku 900 mil florin.

Den e desishon di korte, Hit 100.3 a sede e loke nan mester kobra di e fundashon na Gi-Ro pa eliminá nan debe. Korte ta disidí ku e fundashon mester paga Gi-Ro e suma di mas ku 907 mil plùs gastu di interes for di mei 2025 te dia di e pago. Tambe ta bini aserka 6 mil florin di gastunan di kobransa. E fundashon mester paga mas ku 15 mil florin na gastunan di proseso i interes. Korte a rechasá tur petishon di e fundashon, konsekuentemente e fundashon a pèrdè e kaso riba tur otro punto.