Mi Kas Awor ta habri kaminda pa 370 famia haña nan propio kas

WILLEMSTAD— Fundashon Kas Popular (FKP) a presentá e proyekto piloto Mi Kas Awor. E meta ta pa den e promé aña yuda maksimal 370 famia na Kòrsou pa asina nan por bira doño di nan propio kas.

E programa ta kombiná konstrukshon di kas pagabel, akseso na finansiamentu i guia sosial i finansiero. Mi Kas Awor tin kuater kategoria pa famianan ku diferente nivel di entrada. Dependiendo di e kondishonnan aplikabel, pago mensual pa por haña un kas por kuminsá for di XCG 550.

MKA 1 ta dirigí riba famianan ku un entrada di maksimal XCG 1.000 pa luna. E parti aki lo kuminsá ku 25 famia, ku tambe lo risibí guia sosial. E intenshon ta pa, ku sosten di Ministerio di Desaroyo Sosial, Labor i Bienestar (SOAW), nan propio pago mensual por baha te na mas o ménos XCG 300.

MKA 2, 3 i 4 huntu tin kapasidat pa 345 famia ku entrada mensual for di te ku XCG 2.500, te ku XCG 4.000 i mas haltu ku XCG 4.000.

Gobièrnu di Kòrsou i FKP a komprometé un promé montante konhunto di XCG 2 mion pa aktivá e promé fase. E rekursonan ku gobièrnu a komprometé na yüli 2026 lo forma parti di presupuesto pa 2027.

Tera Kòrá ta e promé lokalidat di desaroyo. E plan ta inkluí shete toren ku 32 apartamento kada un, esta un total di 224 apartamento. Huntu ku e promé fase di Wechi, e desaroyonan ta brinda kapasidat pa 370 kas.

Segun e kalkulonan presentá, e programa por generá te ku 860 trabou direktamente i indirektamente den konstrukshon, desaroyo, servisio, komersio i suministro di material.

Den e proseso di asignashon, FKP lo tene kuenta ku entrada, komportashon di spar, tempu riba lista di espera, kantidat di punto den e sistema di FKP i situashonnan di vulnerabilidat.

FKP ta pidi tur persona riba lista di espera pa aktualisá nan datonan i sigui spar. Datonan aktual i un komportashon konsistente di spar por hunga un papel importante den e proseso di selekshon.