Kontròlnan polisial den kuadro ‘Satis est’ a manda hopi vehíkulo Kurá

WILLEMSTAD— Kuerpo Polisial ta informá ku durante di e promé siman di e plan operashonal ‘Satis est’, polis a ehersé hopi kontròl na diferente sitio rònt Kòrsou. A kontrolá tantu vehíkulonan komo personanan i a konsentrá prinsipalmente den áreanan di atenshon i vulnerabel pa aktividatnan kriminal. Algun di e kontròlnan aki tabata dirigí tambe riba violashon di e lei di tráfiko i esaki a trese kuné ku diferente vehíkulo a keda transportá pa Kurá debí ku nan dokumentunan no tabata na òrdu. Den próksimo simannan e akshonnan aki ta kontinuá tantu durante di oranan di dia komo den oranan di anochi. Kuerpo Polisial ta pidi komunidat pa sigui nos tepnan di prevenshon pa medio di komunikadonan di prensa i riba su plataformanan sosial.

Tambe polis ta informá ku e tim ku ta enkargá ku kòntròl di tráfiko djasabra anochi dia 8 di ougùstùs 2026 tabata aktivo i a repartí un kantidat di prosès verbal pa diferente violashon di e lei di tráfiko. A repartí un total di 16 prosès verbal pa prinsipalmente dokumentunan di vehíkulo ku no tabata na òrdu. Tambe a duna but na shofùrnan ku no tabata disponé di reibeweis bálido i motosikleta ku no tabatin un hèlm. E kontròlnan aki lo kontinuá.