Demanda 12 aña prizòn pa Crump pa asesinato hóben (17)

WILLEMSTAD— 19 aña di edat e siudadano di fam Crump tabatin dia el a asesiná Alex Coffie ku un arma di kandela. Esaki a sosodé riba 13 di desèmber 2025 den serkania di un trùk di pan ku yama  ‘No me olvides’ den e bario Dein. No opstante tur investigashon di parti di polis i reshèrshi no a sali na kla kiko tabata e motibu eksakto pa e asesinato akí, sinembargo Alex Coffie di 17 aña di edat ta esun ku a pèrdè su bida na man di J. Crump, kende djis despues di e asesinato a drenta su outo (un chevrolet Spark koló pretu) i kore bai for di e sitio. Ta manisé numa e kulpabel pa e morto, esta Crump, a presentá na warda di polis pa entregá su mes.

Durante tratamentu di e kaso a bolbe sosodé un tipo di komportashon ku mas i mas ta manifestá serka hóbennan ku haña nan ku hustisia, nan no ta papia i ta sinta den korte komo sifuera e atenshon no tei mes! Remarkabel ta e echo ku wes señora mr. M.C.B Hubben a puntra e akusado si e ta sinti ku mester tene un pousa kòrtiku. Demasiado biaha Crump simpelmente tabata drumi ku su kara riba e mesa su dilanti i ta manera e no tin atenshon mes pa loke ta pasando, siendo tur loke ta pasando tin di haber kuné.

Segun un testigu Crump a kore ku su outo bai baha un mucha muhé na kas pa uriná, miéntras un otro amigu a keda sintá den e vehíkulo ta warda. Segun e persona ku a keda sintá den e vehíkulo ta warda na e sitio, a surgi un pleitu entre Crump i Alex ku tambe a kore yega na e sitio. Alex a kana bini serka di Crump i nan a kuminsá pleita i despues bringa. E testigu a deklará di a skucha Crump bisa Alex: “Duna mi mi kosnan”, pa despues e dosnan akí kuminsá bringa.

Crump a deklará ku el a dal Alex ku e pistol ku e tabatin den su man na esaki su kara pa despues sera su wowo i tira dirigí riba Alex, kende a dal abou morto na e mesun sitio. Ministerio Públiko den persona di fiskal señora K. Hara a presentá un rekistorio den kua un kantidat di persona ku a duna testimonio a keda menshoná, kada un konfirmando ku entre Alex i Crump a surgi un pelea promé, pero ku despues Crump lo a tira ku un arma di kandela hopi djaserka. Den sala di korte Crump a deklará ku el a mira Alex hasi un moveshon komo sifuera ta un arma di kandela e ta bai saka, anto pa tal motibu Crump lo a saka arma di kandela i tira promé. Un di e testigunan a grita bisando ku ta e mucha muhé ku Crump a hiba na un kas den bisindario su falta. Segun dokumento di Ministerio Públiko e mucha muhé akí, di inisial A, lo tabatin un relashon den pasado ku e víktima Alex. E akusado Crump a deklará ku den pasado a yega di surgi un problema entre Alex i  e (Crump) ku nunka mas nan relashon no a drecha. Segun Crump, semper Alex ta kana pasa banda di dje ku su kara bon rabiá.  Alex i Crump a bai skol huntu, pero nan relashon no tabata bon ku otro. Crump a kumpra e arma di kandela 1 ½ aña pasá serka un ‘chamo’. Segun Crump el a tira e arma di kandela afó despues di e asesinato.

Mas aleu a bini padilanti ku Crump lo tin e malesa ADHD, ta trata akí di un malesa ku tin di haber ku trastornu di komportashon. Tantu fiskal señora mr. K. Hara komo wes mr. Hubben a para ampliamente ketu na e kaso,  hasiendo tur sorto di pregunta na e akusado, pero mayoria biaha esaki (Crump) no tabata reakshoná ni mes. Den sala di korte a surgi un momentu di tristesa, kaminda lágrima a deramá for di famianan presente i esei tabata ora ku Crump a pidi despensa pa loke el a hasi, kousando ku Alex a pèrdè su bida.

Crump ta un firstofender. Fiskal señora mr. K. Hara finalmente a demandá un kastigu di prizòn di 12 aña pa Crump, kitando e periodo ku el a pasa den aresto preventivo. Wes a keda ku lo dikta sentensia djarason 1 di yüli.