WILLEMSTAD – No tin duda ku e kaso di e pelotero D. Seferina ta unu hopi komentá na Kòrsou aktualmente. Esaki ta pasobra D. Seferina (32 aña di edat) ta envolví den e investigashon ku ta hasiendo kontra di e gran pelotero profeshonal yu di Kòrsou, J. Schoop. Atraves di e investigashon aki outoridatnan a bin reis riba D. Seferina, kende a resultá di ta den posishon di 1 pistol marka Glock 17, kaliber 9×19, mas 15 bala. Tabata riba 29 di yanüari 2026 último ku outoridatnan a bin sa di e echo kastigabel aki pa kua ta akusá Seferina.

Djabièrnè, 24 di aprel último Seferina a aparesé den sala di korte huntu ku su abogado señor mr. Zahedi. Pa kuminsá ta asina ku Seferina a kai den problema serio na momento ku polisnan na altura di un trùk di pan den e bario Santa Maria a listra den un vehíkulo i a reis riba un arma di kandela bou di e stul di shofùr, kende ta Seferina. Den e vehíkulo aki tabatin mas persona sintá. Seferina na e momentu ei a ninga ku ta su arma di kandela, siendo un otro persona tambe sintá den e outo a tuma e responsabilidat pa e arma di kandela riba dje. Dianan a pasa i Seferina a disidí di presentá na warda di polis pa bisa ku e ta doño di e arma di kandela i no esun ku te asina leu a aseptá e responsabilidat pa e arma di kandela. Den sala di korte djabièrnè último Seferina a deklará ku el a ninga na promé instante, pasobra el a spanta masha i no tabata sa kon reakshoná na momento ku polisnan a deskubrí e arma di kandela, pues ta despues numa el a bin bisa e bèrdat.

Fiskal señora mr. Keller na nòmber di Ministerio Públiko a trese padilanti ku e arma di kandela na e momentonan aki ta bou di investigashon di NFI aya na Ulanda pa por hasi pruebanan di DNA. Mester sa debidamente ta di ken e arma di kandela ta i asina ei evitá ku un di e personanan ta tuma e kulpa riba dje i sinta kastigu pe otro, sin ku esei ta korekto!

Abogado mr. Zahedi a presentá e petishon pa suspendé detenshon di Seferina, argumentando rasonnan di karakter personal na banda di Seferina i basando riba e echo ku Seferina ya a atmití kulpabilidat i asina ei a karga su responsabilidat. Mas aleu e abogado a trese padilanti ku Seferina ta un beisbolista ku ta forma parti di Wild Cats i ku temporada di beisbòl ta na punto di kuminsá. Ta parse ku Seferina ya ta pèrdiendo e oportunidat pa hunga beisbòl na Mexico. Ta nifiká klaramente pèrdèmentu di entrada pa kria su mes i su famia.

Enfin ku suspenshon temporal di e detenshon, segun abogado Zahedi, su kliente Seferina lo kumpli ku tur kondishon ku korte stipulá, esta keda disponibel pa investigashon i presentá na tratamentu di su kaso den korte, no kometé ningun otro delitu, no bandoná Kòrsou, no konsultá ku e otro akusadonan etcetera. Fiskal señora mr. Keller mesora a deklará ku e argumentonan di e abogado no ta di tal índole ku por laga Seferina por lo pronto den libertat, pasobra lo ta un gòlpi duru pa e komunidat di Kòrsou i wes a duna fiskal Keller rason. Pero, tòg korte ta bai di akuerdo pa laga Seferina temporalmente den libertat, mará na algun kondishon fiho. E motibu ku ta laga Seferina temporalmente den libertat, pendiente tratamentu di su kaso riba kontenido dia 19 di ougùstùs binidero, ta pasobra e prosedura di determinashon di DNA via NFI ta durando demasiado largu, anto esei no ta pa falta di Seferina.  Ke men ta motibu pa laga Seferina sali liber temporalmente. No ta nifiká ku Seferina ta liber di e akusashonnan kontra dje!!!