Minister Middelhof: Kòrsou ta importá 87% di su kuminda

WILLEMSTAD – Gobièrnu di Kòrsou a para ketu pa analisá e desaroyonan den mundu i kon esaki ta afekto e komunidat aki. Minister Roderick Middehof enkargá ku Desaroyo Ekonómiko a splika ku un bista riba e desaroyo di 2024 pa awor por nota ku e pais aki a konosé un subida di inflashon di 2%. Preisnan di kuminda a subi ku 2.2%, miéntras ku tarifa di koriente i awa a baha den último tempunan. E preis di gasolin tambe a baha, ta diesel si a subi. Segun minister Middelhof, e punto ta ku Kòrsou ta importá 87% di su kuminda. Pues miéntras sigui ku mas importashon e preisnan lo sigui subi.

Minister Middelhof a duna di konosé ku na 2021, segun preis di petroli a subi i e gastu di kuminda tambe a subi. Na 2023, 2024 i 2025 petroli a baha di preis i preis di kuminda tambe a baha. Te ku 18 martultimo por a nota un subida di preis di apénas 1.36%. 

Pero loke ta pasando ku gastunan di transporte marítimo si ta un problema serio. Segun anunsio di e kompanianan, CMA/CGM ta bai tin un subida di 75%, E kompania King Ocean lo tin un subida di su preisnan di 125%, i Mearsk ku ta e kompania mas grandi na mundu lo tin un oumentu di 65%. 

Gobièrnu di Kòrsou ta preparando pa introdukshon di e kampaña “Sak’i Pueblo”. Esei ta un kampaña pa sostené Fundashon pa Konsumidó, pa nan informá i eduká pueblo kon pa kumpra konsiente. Poblashon mester komprondé ku si sigui importá tur kos e preisnan ta sigui subi. Tambe a reintrodusi makutu básiko pa 18 luna. Ademas ta promové peska lokal, agrikultura i krio di bestia. Esaki lo por pone ku nos por tin mas kontrol riba preisnan. 87% importashon di kuminda ta hopi i esei tin su impakto riba komunidat. Gobièrnu a pone bui pa atraé piska i ta bon pa hasi uso di esakinan.

Finalmente e minister di Desaroyo Ekonómiko a bisa ku apesar ku makutu básiko su lei no a keda introdusié komersiantenan a mustra buena fe i a mantené preisnan. Ademas e empresanan a garantisá ku por lo pronto lo no bai tin oumentunan dramátiko. Ta despues ku preisnan di kombustibel etc subi lo por nota adaptashon di e preisnan.