24 aprel lo tin sentensia den kaso tiramentu dilanti diskotèk Cubaweg

WILLEMSTAD – E siudadano di fam Hooi, kende tin 21 aña di edat, tabata djabièrnè 10 di aprel den sala di korte, akusá di a tira ku arma di kandela i heridá dos otro siudadano, mester a duna kuenta i rason pa su aktonan kastigabel kometé dia 16 di novèmber 2025.

E suseso a tuma lugá den Cubaweg dilanti un diskoteka na momentu ku e negoshi tabata serando su portanan i públiko tabata bandonando e sitio pa regresá kas.

E akusado Hooi ta tata di 1 yu i ta asina tambe ku den pasado kaba el a yega di hañ’é den problema ku hustisia. Riba e dia ariba menshoná Hooi a tira dirigí ku un arma di kandela i a heridá 2 otro persona di famnan Doran i Martinez.

Manera a bini padilanti durante tratamentu di e kaso ta asina ku entre Martinez i Hooi a surgi un pleitu i tabata Martinez kende tabata burachi ku a menasá Hooi ku arma di kandela. Martinez na sierto momento a deklará ku e ta bai kas bini bèk ku su arma di kandela i ta presis loke a sosodé. Hooi awor den sala di korte a konsiderá su komportashon komo un akto di defensa propio, indikando ku ningun momento so e no a tira pa mata, pero sí komo un forma pa defendé su mes. Fiskal na nòmber di Ministerio Públiko a rechasá redondamente e ponensia ku aki lo por ta trata di defensa propio, pasobra segun fiskal e akusado Hooi no tabata den un situashon di asina perkansia ku e no por a aktua otro. Di akuerdo ku fiskal, e akusado aki masha fásil por a kana bai for di e sitio i òf drenta outo i bandoná e lugá, pero ningun momento so Hooi no a skohe p’esei.

Hooi, reakshonando riba fiskal a trese padilanti ku e outo ku el a bini den dje tabata di un otro persona (Christiaan), anto ta netamente esun ku ta manehá, pues e no por a disidí ku e ta drenta e vehíkulo ei i start kore bai. Durante tratamentu di e kaso por a mira loke a pasa na e sitio atraves di filmashonnan i ku outoridatnan a hasi uzo di dje durante e investigashon. Hooi a deklará ku kana na pia bai kas no ta ningun opshon, pasobra di tal manera fásilmente Martinez lo por a yega na dje, dor di kore den e bario ku outo busk’é. E akusado Hooi, kende no a bebe ningun bebida alkohóliko a pidi Christiaan pa laga nan bandoná e sitio, pero esei no a sosodé.

Abogado mr. Zahedi a mustra ku pa motibu ku el a risibí e imágennan aki inkompletu i ademas muchu lat, e no por hiba e defensa manera e ta deseá. Mas aleu e abogado a para ampliamente ketu pa kontradesí e ponensianan di fiskal, mustrando ku e ambiente di tiroteo no ta trankil manera den un sala di korte, kaminda rasonamentu ta parse muchu mas lógiko i probabel. Den un situashon riba kaya, manera tabata e kaso ku su kliente Hooi, kaminda tabatin menasa ku arma di kandela, ta puru ansha i pániko ta dominá. No mester lubidá tampoko ku e siudadano Martinez, kende despues a bira víktima di e tiroteo tabata burachi, no tabatin kòntròl riba su mes i ta ademas esun ku a bai buska arma di kandela na kas.

Mas aleu, segun abogado Zahedi e imágennan ta mustra klaramente ku Martinez tabata molestioso i tabata kana bai bini i kita trankilidat di mas hende ku tabata presente. Pa kolmo, drumí den hospital CMC, despues Martinez mes a rekonosé ku e tabata burachi. Den bista di e abogado, di un persona burachi ningun hende no sa kiko por spera realmente.

Echo ta ku na sierto momento a start un griteria di parti di Martinez su ruman, alegando ku su ruman burachi ta kla pa tira, loke sin duda a krese mas pániko bou di e públiko presente, indikando ku ònferwagt algu fèrfelu por tuma lugá. Outoridatnan a konkluí ku tantu Martinez komo Hooi tabatin arma di kandela na e momento di e suseso. A keda probá ku Hooi a lòs un total di 12 bala, siendo den e vehíkulo di Martinez a haña 1 bala ku lo ta for di e arma di kandela di Martinez mes. A bini padilanti ku e arma ku Hooi a uza no ta di dje, e no a sali for di kas ku ningun arma di kandela, el a simplemente uza un arma ku el a mira i haña den e vehíkulo koló kòrá Toyota Vitz, manehá pa Christiaan.

Fiskal a demandá un kastigu di prizòn di 10 aña pa Hooi i a bai di akuerdo pa daño i perhuisio prinsipalmente pa señora Doran, frei di Martinez. Abogado mr. Zahedi tabata fuerte den su defensa i ta parse di a desbaratá e akusashonnan di fiskal kontra su kliente. Wes señora mr. Bracht a keda ku e ta bai studia tur e imágennan di grabashon di nobo i tambe e argumentonan ku a bini padilanti pa dia 24 di aprel binidero dikta sentensia.